İkbâl için ahbâbı siâyet yeni çıkdı;
Bilmez idik evvel, bu dirâyet yeni çıkdı…
Sirkat çoğalıp lafz-ı sadâkat modalandı;
“Nâmûs” tamâm oldu, “hamiyyet” yeni çıkdı…
“Düşmanlara ahbâbını zemm” oldu zerâfet,
Dildârdan ağyâra şikâyet yeni çıkdı…
“Sâdıkları tahkîr ile red” kaaide oldu,
Hırsızlara ikrâm u inâyet yeni çıkdı…
Hak söyleyen evvel dahi menfûr idi gerçi,
Hâinlere ammâ ki riâyet yeni çıkdı…
Âciz olanın ketmolunur hakk-ı sarîhi
Mahmîleri her yerde himâyet yeni çıkdı…
İsnâd-ı ta'assub olunur merd-i gayûra,
Dinsizlere tevcîh-i reviyyet yeni çıkdı…
İslâm imiş devlete pâ-bend-i terakkî
Evvel yoğ idi, işbu rivâyet yeni çıkdı…
Milliyyeti nisyân ederek her işimizde
Efkâr-ı frenge teba’iyyet yeni çıkdı…
Eyvâh bu bâzîçede bizler yine yandık!..
Zîrâ ki ziyân ortada; bilmem ne kazandık?..
Yazar: ZİYÂ PAŞA |
29-10-09 |
||
E mail: Mail Adresi Yok | Tweet | ||